Müğənni cərrahın cəzalandırılmasını istəyir
“Faytonçu Nazim” ləqəbi ilə tanınan müğənni Nazim Pişiyari onu əməliyyat edən həkimlə bağlı hüquq-mühafizə orqanlarına müraciət edib.
Bu barədə Meydan TV-yə onun vəkili Gülşən Salmanova məlumat verib.
Vəkil bildirib ki, həkim səhlənkarlığı nəticəsində müvəkkilinə maddi və mənəvi zərər dəyib:
“Bununla bağlı Baş Prokurorluğa, Bakı şəhər Prokurorluğuna və Binəqədi rayon Prokurorluğuna müraciət etmişik. Nazim Pişiyari ilk dəfə “Elmed” klinikasında cərrah Elman Əzimov tərəfindən əməliyyat olunub. Lakin əməliyyatdan sonra səhhətindəki problemlər nəinki azalıb, əksinə daha da kəskinləşib. Bundan sonra İsrail və Türkiyədə bir neçə əməliyyat keçirib. Hazırda vəziyyəti normaldır. Həkim səhlənkarlığı və qeyri-peşəkarlıqla üzləşən müğənni həkimin ciddi cəzalandırılmasını tələb edir”.
Meydan TV cərrah Elman Əzimovla əlaqə saxlaya bilməyib. “Elmed”-dən məsələnin nə olduğunu soruşduqdan sonra bildirildi ki, həkim işdə deyil və nə vaxt gələcəyini bilmirlər.
