Nazirliyin aparat rəhbərinin müavini Oğuzun icra başçısı oldu
Eyvaz Qurbanov Oğuz Rayon İcra Hakimiyyətinin başçısı vəzifəsindən azad edilib. Bu barədə iyulun 16-da ölkə başçısı İlham Əliyev sərəncam imzalayıb.
Prezidentin digər sərəncamı ilə Cavid Əbdul-Qədirov Oğuz Rayon İcra Hakimiyyətinin başçısı təyin edilib.
Eyvaz Qurbanov 2011-ci ildən Oğuz Rayonu İcra Hakimiyyətinin başçısı vəzifəsində çalışırdı. O, 2005–2010-cu illərdə Oğuz-Qəbələ seçki dairəsindən Milli Məclisin III çağırış deputatı olub.
Yeni icra başçısı Cavid Əbdül-Qədirov 1984-cü ildə Bakı şəhərində anadan olub. O, İqtisad Universitetinin Maliyyə-kredit fakültəsini bitirib.
2008-2013-cü illərdə Səhiyyə Nazirliyi-HİV/AİDS, vərəm və malyariya ilə mübarizə üzrə Proqramın layihə Əlaqələndirmə Bürosunda maliyyə mütəxəssisi, direktor, 2013-2018-ci illərdə isə “RMDM” ASC-baş direktorun müavini, baş direktor vəzifələrində işləyib.
2018-ci ildə əmək və əhalinin sosial müdafiəsi nazirinin müşaviri, 2018-2020-ci illərdə Nazirlik yanında Dövlət Tibbi-Sosial Ekspertiza və Reabilitasiya Xidmətinin rəisi, 2020-2021-ci illərdə Nazirliyin tabeliyində Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri vəzifələrində çalışıb.
2021-ci ildən etibarən Əmək və Əhalinin Sosial Müdafiəsi Nazirliyinin Aparat rəhbərinin müavini vəzifəsində çalışırdı.
