Azərbaycan Müdafiə Nazirliyi məlumatı təkzib edir
Ermənistan Müdafiə Nazirliyi sentyabrın 1-də səhər saat 11:10-da Sədərək-Yerasx istiqamətində atışma zamanı 39 yaşlı erməni serjant Qeqam Saakyanın ölməsi ilə bağlı məlumat yayıb. Məlumatda deyilir ki, hərbçi snayperlə öldürülüb.
Azərbaycan Müdafiə Nazirliyindən “Report”a bildirilib ki, son vaxtlar Ermənistanın rəsmi və qeyri-rəsmi nümayəndələri Azərbaycan Ordusunun hərbi qulluqçuları tərəfindən atəşkəsin pozulması, meşə yanğınlarının törədilməsi, mal-qara oğurluğu, kənd sakinlərinə qarşı müxtəlif təzyiqlərin edilməsi və digər mövzularda əsassız iddialara söykənən bəyanatlar
yayırlar:
“Bu gün Ermənistan kütləvi informasiya vasitələrində Azərbaycan Ordusu tərəfindən snayper tüfəngindən açılmış atəş nəticəsində erməni hərbi qulluqçunun həlak olması barədə yayılan məlumat da yalandır, təxribat xarakteri daşıyır. Bu gün məlumatda göstərilən istiqamətdə Azərbaycan Ordusunun bölmələri tərəfindən heç bir atəş açılmayıb. Bildiririk ki, Ermənistan ordusunda baş verən cinayətlər və qanlı insidentlər orada hökm sürən özbaşınalıq və nizamnamədən kənar münasibətlərin nəticəsidir və bu hadisələrin Azərbaycan Ordusu ilə heç bir əlaqəsi yoxdur”.