“Bu məsələ üzrə artıq məhkəmə qərarı varsa, iki qərar çıxarıla bilməz ki?”
“Mən yenidən məhkəmə prosesinə cəlb ediləcəyim haqda informasiyalar alıram”, – Demokratik Qüvvələrin Milli Şurası Koordinasiya Mərkəzinin üzvü Eldəniz Quliyev “Turan İA”-ın müxbirinə bu barədə danışıb.
Yol polisi haqqında yazdığı statusa görə bu ilin oktyabrında daxili işlər naziri Ramil Usubov xüsusi ittiham qaydasında E.Quliyevin barəsində Nəsimi Rayon Məhkəməsinə müraciət edib. Oktyabrın sonu noyabrın əvvəlində Cinayət Məcəlləsinin 147-ci (təhqir) və 148-ci (böhtan) maddələrilə məhkəmə prosesi keçirilib. Məhkəmə E.Quliyevin 1000 manat cərimə və 480 saatlıq ictimai işə cəlb edilməsi barədə qərar çıxarıb.
E.Quliyev qeyd edib ki, hələ məhkəmə zamanı vəkili yol polisinin daha iki müfəttişinin bu məsələ ilə bağlı məhkəməyə müraciət edəcəyi haqda informasiya verib. “Mən yenidən məhkəməyə verilməyim haqda infromasiyanın nə dərəcədə dəqiq olduğunu bilmirəm. Amma bu varsa, vaxtilə nazirin qaldırdığı məsələ ilə bağlıdır, amma bu məsələ üzrə artıq məhkəmə qərarı varsa, iki qərar çıxarıla bilməz ki?”, – E.Quliyev bildirib.
