Əhəd Məmmədov 1969-cu ildə Şəkidə anadan olub. O, dulusçuluğu atasından öyrənib. İndi də bu sənəti öz övladlarına öyrədir. Əhəd usta deyir ki, işlədiyin işə sevgi ilə yanaşsan, həmin iş səni yaşadacaq: “Daim öz işimizə ürək qoymuşuq. Bu sənət bizi yaşadır. Babamdan ta bugünə kimi gəlib çıxıb. Əgər bu sənət bizi dolandırmasa, həmin günü biz bu sənəti tərk edəcəyik”.
“Dulusçuluq incəlik tələb edən bir işdir. Palçıq, yaxud su çox olarsa, hazırlanacaq məhsul keyfiyyətli olmaya bilər. Ona görə çalışırıq, daha keyfiyyətli və daha dəqiq işləyək” – deyir Əhəd usta.
Saxsı qabların bir özəlliyi də ondan ibarətdir ki, burada olan məhsullar daha keyfiyyətli və uzunömürlü olur.
Əhəd usta deyir ki, bir piti qabının hazırlanmasına 15-20 dəqiqə vaxt sərf olunur. Qab hazır olduqdan sonra 2-3 gün qurudulmasına vaxt gedir. Daha böyük işlər hazırlayanda isə 4-5 gün vaxt sərf olunur.
Saxsı qabların da qiyməti 7 manatdan 200 manata qədərdir.
