“Jurnalistlərə zorakılıq edilir, əsassız həbslər var…”
ABŞ Dövlət Departamenti insan haqları üzrə illik hesabat yayıb. Hesabatın Azərbaycanla bağlı hissəsində deyilir:
“Azərbaycanda qeyri-qanuni, özbaşına qətllər, işgəncələr, digər qəddar, qeyri-insani, ləyaqəti alçaldan hərəkətlər, bununla bağlı sui-istifadə halları, habelə, həbsxanalarda ağır şərait hökm sürür”.
Məlumatı “Turan” martın 21-də yayıb.
Dövlət Departamentinin 2022-ci il İnsan Hüquqları Hesabatı əsassız həbslər, siyasi məhbuslar, ölkədən kənarda siyasi motivli repressiyalar, müstəqil məhkəmə sisteminin olmaması, şəxsi həyatın toxunulmazlığına qanunsuz müdaxilə, söz və media azadlığına ciddi məhdudiyyətlər və digər insan hüquqları pozuntularını əks etdirir.
“Hesabatda həmçinin jurnalistlərə qarşı zorakılıq, jurnalistlərin böhtan və şübhəli ittihamlarla təqib və həbs edilməsi, internet azadlığının məhdudlaşdırılması, o cümlədən vebsaytların bloklanması, dinc toplaşmanın de-fakto qadağası, birləşmək və hərəkət azadlığına əhəmiyyətli müdaxilə də qeyd olunur toxunulur”,-deyə qeyd olunur.
Sənəddə hökumətin sistemli korrupsiyasına və gender zorakılığa görə tədbiri olmamasına da istinad edilir:
“Hökumət insan hüquqlarının pozulmasına və korrupsiya əməllərinə yol verdiyi bildirilən əksər məmurları təqib etmir və cəzalandırmır; cəzasızlıq problem olaraq qalır”.
Hesabatda bildirilir ki, il ərzində Ermənistanla Azərbaycan arasında insan ölümləri və həbslərlə nəticələnən zorakılıq hadisələri baş verib:
“2020 və 2022-ci illərdə hərbi əməliyyatlar zamanı Azərbaycan silahlı qüvvələri və ya ayrı-ayrı şəxslər tərəfindən törədilən sui-istifadə halları ilə bağlı hökumətin araşdırmasında irəliləyişlə bağlı heç bir məlumat yoxdur”.
Dövlət Departamentinin brifinqində çıxış edən dövlət katibi Entoni Blinken deyib ki, onlar heç kimlə mübahisə etmir, bəzən açıq danışır, bəzən də bunu özəl edirlər:
“Hər bir halda biz insan hüquqlarının təbliğində və insan ləyaqətinin yüksəldilməsində dəstək olmağa çalışırıq”.
Dövlət katibinin demokratiya, insan haqları və əmək üzrə köməkçisi vəzifəsini icra edən Erin Barklay “Turan” müxbirinin Bəxtiyar Hacıyev, Əli Əliyev, Gürcüstanda eks-prezident Saakaşvili və bir çox başqaları kimi siyasi məhbusları azad etmək üçün alətə malik olub-olmadığı haqda suala belə cavab verib:
“Biz mütəmadi olaraq siyasi məhbuslarla bağlı məsələləri qaldırırıq və bunu gələcəkdə də edəcəyik”.
