“Əgər bu addım atılmasa, ciddi problemlərlə üzləşə bilərik
”
“Azərbaycan manatın yumşaq devalvasiyası prosesinə keçmək lazımdır”. Bu fikri deputat Vahid Əhmədov Milli Məclisin İqtisadi Siyasət, Aqrar Siyasət, Təbii Ehtiyatlar və Energetika, Sosial Siyasət, Təhlükəsizlik və Müdafiə Komitələri tərəfindən keçirilən 2016-cı il üzrə Azərbaycanın dövlət büdcəsinin layihəsinin müzakirəsi zamanı səsləndirib.
V. Əhmədovun sözlərinə görə, gələn ilin dövlət büdcəsinin layihəsində manatın dollara qarşı məzənnəsi 1,05 manat səviyyəsində müəyyənləşib.
“Cari ilin fevralın 21-də baş verən devalvasiyadan sonra manat təxminən 35 faiz ucuzlaşdı. Nəticədə əhali narahat olmağa başladı. İndi vəziyyət düzəlibmi? Azərbaycan Mərkəzi Bankı valyuta bazarına hələ də müdaxilə edir, intervensiya aparır. Devalvasiyadan qabaq Mərkəzi Bankın valyuta ehtiyatları 15 milyard manat idisə, hazırda 7,4 milyard manata enib. Ötən müddət ərzində Mərkəzi Bankın valyuta ehtiyatları kəskin azalıb. Aparılan intervensiya valyuta ehtiyatlarının kəskin azalmasına səbəb olur. Hesab edirəm ki, manatın məzənnəsinin bazar qiymətləri əsasında tənzimlənməsinə başlanılmalıdır. Əgər bu addım atılmasa, ciddi problemlərlə üzləşə bilərik”, – deyə Əhmədov bildirib (modern.az).
