“
Paşinyan Ermənistanın Azərbaycan ərazilərinin ilhaqı siyasətini təsdiq edib”
Dağlıq Qarabağın Azərbaycanlı icması ATƏT-in Minsk Qrupunun həmsədrlərinə Ermənistan baş naziri Nikol Paşinyanın avqustun 5-də Xankəndində verdiyi bəyanatla bağlı məktub göndərib.
“Panerməni oyunları”nın açılış mərasimində çıxış edən Paşinyan bildirib ki, “Qarabağ Ermənistandı”. “Bununla da o, Ermənistanın Azərbaycan ərazilərinin ilhaqı siyasəti həyata keçirdiyini təsdiq edib”, – deyə müraciətdə qeyd edilir.
Müraciətdə daha sonra qeyd edilir ki, Paşinyanın münaqişənin sülh yolu ilə həllinə çalışması haqqında bəyanatı beynəlxalq ictimaiyyəti və ATƏT-in Minsk Qrupunu yanıltmaq, ilhaq siyasətinə bəraət qazandırmaq cəhdidir.
Müraciət müəllifləri ATƏT MQ-ni Ermənistan baş nazirinin əməllərini pisləməyə çağırırlar.
Ermənistanın Baş naziri Nikol Paşinyan çıxışında ermənilərin 1988-ci ildəki “'birləşmə” şüarını təkrar edib ki, bu da Azərbaycanda kəskin etiraza səbəb olub.
