“Sahibkarın boynuna o qədər yük qoyular ki, onlar on illərlə gəlir götürmür”
“Hərənin bir himayəçisi olanda nə olar ki? Mənzilinin pulunu verən hər kəs mülk sahibi olmalıdır”.
Bunu Milli Məclisdə çoxmənzilli binaların idarə edilməsi qaydalarının pozulmasına görə cəzaları müəyyən edilməsi ilə bağlı İnzibati Xətalar Məcəlləsinə və Mənzil Məcəlləsinə dəyişiklik layihəsinin müzakirəsi zamanı deputat Fazil Mustafa deyib. O bildirib ki, Azərbaycanda ən ciddi problem yeni tikilən mənzillərlə bağlıdır. Deputatın sözlərinə görə, bu vaxta qədər tikilən binalarda hər hansı məsələ ilə bağlı sakinlər söz sahibi deyil və MTK rəhbərləri istədikləri qayda ilə idarəçilik edirlər.
Fazil Mustafa mənzil fırıldaqçılığında bütün məsuliyyətin sahibkarın üzərində qalmasının doğru olmadığını da bildirib: “Sahibkarın boynuna o qədər yük qoyular ki, onlar on illərlə gəlir götürmür. Bununla yanaşı, eyni mənzilin bir neçə şəxsə satılmasında təkcə sahibkar məsuliyyət daşımır. Həmin sahibkara yenidən bu işlə məşğul olmağa imkan yaradılır. Bu, mənzil firıldaqçılığı aradan qaldırmaq üçün şərtdir. Onsuz da bina tikiləndən sonra liftin, mərtəbələrin təmirini də mənzil sahibləri edir. Hesab edirəm ki, kosmetik dəyişikliklə məsəli həll edə bilmərik. Daha ciddi təkliflər irəli sürməliyik”.
Məcəlləyə əlavə edilən 393-1-ci (Mənzil qanunvericiliyinin pozulması) maddəyə əsasən, kooperativ binanın tikintisi və ya yenidən qurulması tam başa çatdıqdan və həmin binada mövcud olan yaşayış və qeyri-yaşayış sahələrinin ümumi sayının 50 faizindən çoxuna mülkiyyət hüququ mənzil-tikinti kooperativinin üzvlərinə keçdikdən sonra 1 ay müddətində mənzil-tikinti kooperativinin qanunla müəyyən olunmuş qaydada ləğvi və ya mənzil mülkiyyətçilərinin müştərək cəmiyyətinə çevrilməsi barədə qərar qəbul edilməməsinə və ya qəbul edilən həmin qərarla bağlı hüquqi şəxslərin qeydiyyatı haqqında qanunvericiliyə uyğun olaraq zəruri tədbirlərin görülməməsinə görə vəzifəli şəxslər 2 000, hüquqi şəxslər isə 5 000 manat məbləğində cərimə olunur.
Çoxmənzilli binanın idarəetmə üsulunun seçilməsi məsələsinin həlli üçün həmin binanın yerləşdiyi ərazinin bələdiyyəsi tərəfindən Mənzil Məcəlləsi ilə müəyyən edilən qaydada tədbirlərin görülməməsinə görə vəzifəli şəxslər 300 manatdan 500 manatadək məbləğdə cərimə edilir.
Müvafiq icra hakimiyyəti orqanının müəyyən etdiyi qaydanı pozmaqla, çoxmənzilli binanın idarə edilməsi, habelə həmin qaydanın müddəalarının (o cümlədən, həmin qaydada edilən sonrakı dəyişikliklərin) çoxmənzilli binanın idarə edilməsi müqaviləsində əks etdirilməməsinə görə vəzifəli şəxslərə 500 manatdan 800 manatadək, hüquqi şəxslərə isə 1 500 manatdan 2 500 manatadək məbləğdə cərimə tətbiq olunur.
Çoxmənzilli binanın sahə mülkiyyətçisi tərəfindən ona məxsus olan sahənin saxlanması xərclərini, habelə mənzil qanunvericiliyinə uyğun olaraq çoxmənzilli binanın ümumi əmlakının saxlanması xərclərini vaxtında və tam məbləğdə çəkməkdən boyun qaçırmasına görə ödənilməli olan ödənişlərin məbləğinin 100 faizindən 50 faizinədək məbləğdə cərimə edilir.
Ağır xroniki xəstəliklərə düçar olan şəxsin sosial kirayə müqaviləsinə əsasən yaşadığı və ya köçdüyü yaşayış sahəsinin ikinci əldən kirayəyə verilməsinə görə 100 manat məbləğində cərimə tətbiq edilir.
Çoxmənzilli binanın sahə mülkiyyətçilərinə Mənzil Məcəlləsi ilə müəyyən olunan qaydada binanın idarə edilməsi üsulunun seçilməsində maneçilik törədilməsinə görə vəzifəli şəxslər 300 manatdan 800 manatdək, hüquqi şəxslər isə 1 000 manatdan 2 000 manatadək məbləğdə cərimə edilir.
