İsveçrə XİN-i hüquq müdafiəçisinin səfirlikdə olduğunu təsdiqləyib
Civil Rights Defenders beynəlxalq hüquq-müdafiə təşkilatı Azərbaycan hakimiyyətini tanınmış fəal Emin Hüseynovun üzərindən ittihamları götürməyə çağırıb.
Təşkilatın bəyanatında deyilir ki, E.Hüseynov hakimiyyətin repressiyalarından xilas olmaq üçün İsveçrə səfirliyində sığınmağa məcbur olub.
“Civil Rights Defenders” və digər beynəlxalq hüquq-müdafiə təşkilatları hesab edirlər ki, E.Hüseynova qarşı irəli sürülən vergidən yayınma, qanunsuz sahibkarlıq kimi ittihamlar siyasi motivlidir.
“Civil Rights Defenders Azərbaycan hakimiyyətini Emin Hüseynova və Reportyorların Azadlıq və Təhlükəsizlik İnstitutuna qarşı saxta ittihamları götürməyə çağırır”, – bəyanatda deyilir (Turan İA).
***
Hazırda Azərbaycan vətəndaşı Emin Hüseynov İsveçrənin Bakıdakı səfirliyindədir. Bunu Trend-ə İsveçrə Xarici İşlər Nazirliyinin mətbuat katibi Ursina Şmit deyib.
Onun sözlərinə görə, o, 2014-cü il avqustun 18-də səfirliyə müraciət edib: “Bundan sonra İsveçrə ona humanitar səbəblərə görə qalma icazəsi təqdim edib. Həmin vaxtdan İsveçrə müraciət edən vətəndaşın maraqlarına uyğun olaraq bu məsələnin həlli üzrə Azərbaycan hakimiyyəti və hökuməti ilə danışıqlar aparır”.
E.Hüseynov barəsində Azərbaycan Respublikasının Baş Prokurorluğu tərəfindən Cinayət Məcəlləsinin 192.2.2 (qanunsuz sahibkarlıq), 213.2.2 (vergi ödəməkdən yayınma) və 308.2-ci maddələrində nəzərdə tutulan ittiham elan olunmaqla, 19 avqust 2014-cü il tarixdə məhkəmənin qərarı ilə həbs qətimkan tədbiri seçilərək axtarış elan edilib.
Trend xəbər verir ki, bunu mətbuata açıqlamasında Xarici İşlər Nazirliyinin mətbuat xidmətinin rəhbəri Hikmət Hacıyev bildirib.
Azərbaycan XİN rəsmisi qeyd edib ki, məhkəmə qərarı əsasında aparılmış araşdırmalar nəticəsində E.Hüseynovun “Reportyorların Azadlıq və Təhlükəsizlik İnstitutu” ictimai birliyinin sədri kimi qeydiyyata alınmayan qrant müqavilələri üzrə qanunsuz sahibkarlıq fəaliyyətini həyata keçirərək 1.575.956 manat məbləğində külli miqdarda gəlir əldə etdiyi və dövlət büdcəsinə ödənilməli olan 247.551 manat məbləğində xeyli miqdarda vergiləri ödəməkdən yayındığına dair əsaslı şübhələr müəyyən edilib: “7 iyul 2014-cü il tarixindən etibarən Emin Hüseynov dəfələrlə ünvanına çağırış vərəqələri göndərilməklə istintaqa dəvət edilsə də, qaçaraq İsveçrə Konfederasiyasının Azərbaycan Respublikasındakı səfirliyində gizlənib”.
H.Hacıyev deyib ki, Azərbaycan Respublikasının Konstitusiyasına əsasən, hər bir vətəndaşın təqsirsizlik prezumpsiyası hüququ var.
Hazırda Baş Prokurorluğun Ağır cinayətlərə dair işlər üzrə istintaq idarəsində cinayət işi üzrə zəruri istintaq tədbirləri davam etdirilir.
