İlham Şaban iclası ”texniki görüş” adlandırıb
Fevralın 15-də Bakıda “Cənub Qaz Dəhlizi” üzrə Məşvərət Şurasının növbəti toplantısı keçirilib.
Tədbirdə ölkə başçısı İlham Əliyev, habelə “Cənub Qaz Dəhlizi”nin iştirakçısı olan ölkələrin energetika nazirləri, həmçinin Avropa Komissiyasının energetika üzrə vitse-prezidenti Maroş Şefkoviç iştirak edib.
“Cənub Qaz Dəhlizi” Bakı-Tbilisi-Ərzurum qaz kəmərinin genişləndirilməsini, həmçinin Türkiyədə TANAP qaz kəmərinin tikintisini və onun Avropaya qədər uzadılmasını (TAP) nəzərdə tutur.
Layihənin nəzərdə tutulan uzunluğu 3500 kilometrdir. Layihənin əsas məqsədi Avropaya qaz nəqlinin təhlükəsizliyini artırmaqdan, qaz tədarükçüsü kimi Rusiyanın payını azaltmaqdan ibarətdir. Layihənin bəyan edilmiş dəyəri 45 milyard dollardır.
Bu layihənin tam həcmdə həyata keçirilməsi Türkmənistan və İranın qaz tədarükçüsü kimi ona qoşulmasını nəzərdə tutur. Bəzi mənbələrin məlumatına görə, Rusiyanın “Qazprom” şirkəti də CQD infrastrukturu ilə Avropaya qaz nəqlinə iddia edə bilər.
Azərbaycanın Xəzərin dibinin və mübahisəli neft yataqlarının bölünməsi məsələsinin razılaşdırılmasında yaxınlaşdığı Türkmənistan da layihəyə açıq-aşkar maraq göstərir.
İlk qaz nəqlinin 2018-ci ildə əvvəlcə Türkiyəyə, 2019-cu ildə isə Avropaya həyata keçirilməsi planlaşdırılır. Bu zaman yeni qaz kəmərinin ilk mərhələdə buraxılış qabiliyyətinin ildə 10 mlrd. kubmetr olacağı, sonradan ildə 20 milyard kubmetrə qədər artırılacağı gözlənilir.
Toplantını şərh edən Neft Araşdırmalar Mərkəzinin rəhbəri İlham Şaban onu “texniki görüş” adlandırıb.
O, Meydan TV-yə deyib ki, məqsəd 2013-cü ildə imzalanmış Azərbaycanın dünya bazarına çıxarılmış qazının tərəfdaşlarla birgə illik vəziyyətinə dair məsləhətləşmələr aparmaqdır:
“Başqa hər hansı piar, yaxud əlavə məsələ yoxdur”.
