İlkin olaraq, qızın narkozun dozasının yüksək olması səbəbindən öldüyü ehtimal edilir
Azərbaycanda burnundan plastik əməliyyat olunmaq istəyən tələbə qız dünyasını dəyişib.
Trend-in əldə etdiyi məlumata görə, Azərbaycan Maliyyə-İqtisad Kollecinin tələbəsi olan Leyla Namiq qızı Mürsəlova martın 17-də “StarMed” adlı özəl klinikada burnundan plastik əməliyyat olunmaq istəyib. Lakin tələbə qıza əməliyyat üçün narkoz verilən kimi o dünyasını dəyişib. İlkin olaraq, qızın narkozun dozasının yüksək olması səbəbindən öldüyü ehtimal edilir. Mərhumun həkiminin cərrah Sənan Mehdiyev olduğu bildirilib.
Kollecdən L.Mürsəlovanın ölüm faktını təsdiqləyiblər.
Kollecdən Trend-ə deyilib ki, rus bölməsində maliyyə ixtisası üzrə 94-cü qrupda təhsil alan L.Mürsəlova III kurs tələbəsi olub. O, bu il məktəbi başa vuracaqdı. Kollecdən də L.Mürsəlovanın narkoz verilən zaman dünyasını dəyişdiyi bildirilib.
Səhiyyə Nazirliyinin mətbuat xidmətinin rəhbəri Anar Qədirli Trend-ə deyib ki, faktla bağlı nazirliyə hər hansı rəsmi məlumat daxil olmasa da, məsələ araşdırılacaq. Müvafiq məlumatlar daxil olduqdan sonra Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyi tərəfindən ekspertiza həyata keçiriləcək. Bundan sonra isə Səhiyyə Nazirliyi faktla bağlı tədbirlər görə bilər.
Məsələ ilə bağlı əlaqə saxlanılan Sənan Mehdiyev əvvəlcə şəxsin özü olduğunu təsdiqləsə də, sualları eşitdikdən sonra “danışan Sənan müəllimin köməkçisidir, siz bir saatdan sonra əlaqə saxlayın” deyərək, telefon əlaqəsini dayandırıb. Sonradan dəfələrlə zəng olunmasına baxmayaraq, S.Mehdiyev telefona cavab verməyib.
