Fransada yaşayan bloger Məhəmməd Mirzəli bıçaqlanıb.
Məlumatı Almaniyada yaşayan jurnalist Əfqan Muxtarlı yayıb. Daha sonra isə Məhəmməd Mirzəlinin olayı təsdiqləyən video görüntüsü yayımlanıb.
Həmin görüntülərdə o bildirir ki, küçədə qarşısını kəsib, əllərini, boynunu doğrayıblar. Hazırda isə xəstəxanada müalicə alır.
"Vəziyyətinin ağır olduğu söylənilir. Hakimiyyət başkəsən mahiyyətindən əl çəkmir", – Əfqan Muxtarlı belə deyir.
O, Məhəmməd Mirzəli ilə telefonla danışdığını da söyləyir: “Mənə dedi ki, küçədə getdiyi yerdə telefonla danışıb. O, 6 nəfərin hücumuna məruz qaldığını söyləyib.
"6 nəfər yolda tutub sözün əsl mənasında onu doğrayıblar. Boynunun arxasından, qarnından ağır xəsarət alıb. Əllərini, barmaqlarını kəsik kəsik ediblər. Qollarını doğrayıblar", – Əfqan Muxtarlı bildirib.
Məhəmməd Mirzəli ötən həftə ailə üzvünə qarşı kibercinayət törədildiyini, hədələndiyini deyirdi.
O, hakimiyyəti tənqid edən şəxs kimi tanınır.
Meydan TV blogerin ailə üzvləri ilə əlaqə saxlaya bilməyib.
