Qubad İbadoğlu nizamnamə çərçivəsində qərarlar qəbul edəcəyini bildirdi
“Müsavat qurultayında keçirilən seçkilərdə təbii ki, xoşagəlməz hallar olub. Ancaq heç ideal seçki keçirmək də mümkün deyildi. Xoşagəlməz halları hərə bir cür ifadə edir. Ancaq biz hər şeyin Nizamnamə çərçivəsində tənzimlənməsinin tərəfdarıyıq. Həftə sonuna kimi məsləhətləşmələr aparıb, növbəti addımlarımızı açıqlayacağıq”.
Bu sözləri apa-ya açıqlamasında Müsavat başqanlığına sabiq namizəd Qubad İbadoğlu deyib.
Q. İbadoğlu bildirib ki, hazırda başqanlıq seçkisinin nəticələri və veriləcək qərarlarla bağlı müzakirələr davam edir: “Məsələ bundan ibarətdir ki, partiyanın strukturları formalaşmalıdır. Məclisə seçkilər keçirilib, ancaq demək olar ki, yarımçıqdır. Biz bu prosesin yekunlaşmasını gözləyəcəyik və ondan sonra Nizamnamə çərçivəsində qərarlar qəbul etmək niyyətindəyik”.
Sentyabrın 27-də Müsavat Partiyasının VIII qurultayı keçirilib. Qurultayda Arif Hacılı 228 səslə partiyanın başqanı seçilib. Q. İbadoğlu 200 isə səslə ikinci olub.
