Qarlı havada qəza vəziyyəti yaradan sürücülər inzibati məsuliyyətə cəlb ediləcək
“Qeyri-sabit hava şəraitinin davam etməsi ilə əlaqədar yollarda meydana gələ biləcək yol qəzalarının və əvvəldə qeyd olunan halların qarşısının alınması məqsədilə, Baş DYP İdarəsi sürücülərin bir daha diqqətinə çatdırır ki, şaxtalı, qarlı hava şəraitində qış mövsümünə uyğun şinlərlə təchiz edilməmiş, eləcə də istismar müddəti çox olan, “ABS” tormoz sistemləri ilə təchiz olunmayan köhnə avtomobillərdən istifadə olunmamalı, nəqliyyat vasitələrinin hərəkət sürüəti hava şəraitinə uyğun seçilməli, zərurət olmadan ötmə əməliyyatları aparılmamalı, qəfil manevrlər və kəskin tormozlama hərəkətləri edilməməlidir. Əks təqdirdə idarə olunan nəqliyyat vasitəsi yol hərəkətində iştirakdan kənarlaşdırılmaqla sürücü inzibati məsuliyyətə cəlb ediləcək”.
Baş Dövlət Yol Polisi İdarəsinin (BDYPİ) qeyri-sabit hava şəraitinin davam etməsi ilə əlaqədar sürücülərə və avtomobil sahiblərinə müraciətində belə deyilir.
BDYPİ-nin şöbə rəisi, polis polkovniki Kamran Əliyevin “Report”a verdiyi məlumata görə, son 3 gündə aparılan müşahidələr göstərir ki, asfalt örtüyünün buz bağladığı vaxtlarda yolun hərəkət hissəsində qalmaqla başqa hərəkət iştirakçılarının, xüsusilə təcili tibbi yardım, qəza-xilasetmə və digər operativ nəqliyyat vasitələrinin də çağırış yerinə getməsinə mane olan avtomobillərin əksəriyyəti texniki cəhətdən nasaz olan, qış mövsümünə uyğun olmayan və protektorları yeyilmiş şinlərlə təchiz edilmiş nəqliyyat vasitələridir.
Şöbə rəisi bütün avtomobil yollarında nəqliyyatın hərəkətinin olduğunu deyib: “Ələt-Astara-İran İslam Respublikası dövlət sərhədi avtomobil yolu, Lənkəran-Lerik, Masallı-Yardımlı avtomobil yollarının keçdiyi ərazilərdə sulu qar yağır. Həmin yollarda da hərəkətdə heç bir problem yoxdur”.
