DİN onların üzərində zorakılıq əlaməti olmadığını deyir
Yanvarın 5-də səhər saatlarında Bakı şəhəri, Nərimanov rayonundakı mənzillərin birində 4 kişi meyiti aşkarlanıb.
Fövqəladə Hallar Nazirliyinin (FHN) yaydığı məlumata görə, qaynar xəttə giriş qapısının açılmaması səbəbindən xilasedici köməyinə ehtiyac olması barədə məlumat daxil olub.
Hadisə yerinə cəlb olunan Xüsusi Riskli Xilasetmə Xidmətinin xilasediciləri yaşayış binasının birinci mərtəbəsində yerləşən mənzilin giriş qapısını açıblar. Mənzildə 4 nəfərin meyiti aşkar olunub.
Daxili İşlər Nazirliyinin Mətbuat Xidmətinin məlumatına görə, cəsədlərin üzərində zorakılıq əlamətləri müəyyən olunmayıb.
İlkin məlumata görə, onların dəm qazından boğulduğu və ya qidadan zəhərlənərək öldüyü ehtimal edilir.
Faktla bağlı araşdırma aparıldığı bildirilir.
