Şagirdlərin salatdan zəhərləndiyi deyilir
Gəncə şəhər 3 nömrəli tam orta məktəbin altı nəfər şagirdinin zəhərləndiyi bildirilir.
“Tibbi Ərazi Bölmələrini İdarəetmə Birliyi”nin (TƏBİB) mətbuat xidmətindən Meydan TV-yə verilən məlumata görə, hadisə oktyabrın 7-də saat 11:30 radələrində olub.
Gəncə Şəhər Birləşmiş Xəstəxanasının nəzdindəki Abbas Səhhət adına xəstəxananın Yoluxucu xəstəliklər şöbəsinə zəhərlənmə ilə 6 yeniyetmə daxil olub.
“İlkin tibbi yardım göstərildikdən sonra onlardan dördü ambulator müalicə üçün evə buraxılıb. Hazırda iki nəfərin müalicəsinə tibb müəssisəsinin İntensiv terapiya şöbəsində davam edilir, vəziyyətləri orta stabildir”, – TƏBİB-in mətbuat sözçüsü Zamirə Ədilova deyib.
APA-nın əldə etdiyi məlumata görə, şagirdlər məktəbdə dərs zamanı özlərinin hazırladığı salatdan zəhərləniblər.
Zəhərlənən şagirdlər 2010-cu il təvəllüdlü Əlizadə Yusif Anar oğlu, Babayeva Ayşə Ramin qızı, Paşayeva Nuray Nicat qızı, 2011-ci il təvəllüdlü Bağırov Məhəmməd Mətləb oğlu, Heydərova Zeynəb Seymur qızı və Aslanova Aytac Samir qızıdır.
