Misirdə terror təhlükəsi, İndoneziyada isə baş verən vulkan çağırışa səbəb olub
Azərbaycan Turizm Assosiasiyası (AzTA) Azərbaycan vətəndaşlarını Misirə və İndoneziyaya turist səfərinə getməməyə çağırıb. Məlumatı “Turan” yayıb.
Assosiasiya noyabrın 24-də Misirdə baş verən terror hadisəsindən sonra Azərbaycan vətəndaşlarının həmin ölkəyə getməsini tövsiyə etmir.
Assosiasiyanın İndoneziyaya getməmək tövsiyəsi isə Bali adasında püskürən vulkanla bağlıdır.
Noyabrın 21-dən İndoneziyanın Bali adasında Aqunq vulkanı püskürür. Bununla əlaqədar hökumət 100 min sakinin təxliyə olunmasını tövsiyə edib. Hazırda İndoneziyada təqribən 60 min turistin olduğu bildirilir.
Noyabrın 24-də isə Misirin Əl-Ariş şəhərindəki məscidin partladılması nəticəsində 300-dən çox adam ölüb, onların 27-i uşaqdır.
