Azərbaycan vətəndaşı gömrük məntəqəsində ölüb

Astara rayon sakininin ürəktutması olduğu bildirilir

Source:

Astara gömrüyü
Astara gömrüyü

Astara rayon sakininin ürəktutması olduğu bildirilir

Astara Gömrük Məntəqəsində İrana getmək istəyən Azərbaycan vətəndaşı İlqar Kərimovun növbədə vəfat etdiyi bildirilir.

Astara rayon sakini olan İlqar Kərimovun ürəktutmadan öldüyü güman edilir.

Azadlıq Radiosinun məlumatına görə, hadisə dekabrın 28-də, günün ikinci yarısında baş verib.

Hadisənin şahidi, Astara şəhər sakini Fərbiyə İbayeva deyib ki, həmin gün İrana getmək istəyənlər çox olub:

“Adamlar gömrüyün qapısında toplaşdılar. Qapını səhər saat 9-da açanda basabas düşdü. Adamların fəryadı qulaq batırırdı. Ölən adam da bizim aramızda idi. Mənim iki qolum da zədələndi. Biz içəriyə girdik, qapını yenidən bağladılar. O adam münasib bir yer tapan kimi əyləşdi. Görünürdü ki, sıxıntı keçirdib. İranla Azərbaycan arasında olan körpüyə çatanda kənara çəkilib əyləşdi. Orda da keçindi”.

Fərbiyə İbayeva Azərbaycanda zəruri ərzaq məhsulların qiymətlərinin gündən günə qalxdığından şikayətlənib:

“Məcbur olub İrana ucuz ərzaq dalınca gedirlər. Ayda bir dəfə sərhəddən buraxırlar. Hər kəs bu fürsətdən istifadə etməyə çalışır”.

Mərhumun yaxınlarının dediklərinə görə, İlqar Kərimov İrana bazarlığa gedirmiş. Ürək xəstəsi olub. Yolda dərman qəbul etsə də, təsiri olmayıb.

Astara Gömrük İdarəsində isə İlqar Kərimovun növbədəki sıxlıq üzündən ölməsi fikri ilə razılaşmırlar. Faktla bağlı hüquq mühafizə orqanlarında araşdırmaya başlandığı bildirilir.

Ana səhifəXəbərlərAzərbaycan vətəndaşı gömrük məntəqəsində ölüb