Natiq Cəfərli: Bu ölkənin iqtisadiyyatı Avropanın 37 min əhalisi olan, ən balaca knyazlığı Andorranın iqtisadiyyatlndan 10 dəfə kiçikdir
“Report” xəbər verir ki, bunu Uaqaduquda səfərdə olan Azərbaycan nümayəndə heyətinin rəhbəri, energetika naziri Natiq Əliyev bildirib. Azərbaycanlı nazir bu sözləri Burkina-Fasonun dövlətinin başçısı Roç Mark Kristian Kabore ilə görüşdə dilə gətirib.
“Biz azərbaycanlılar çətin yol keçmişik və bu gün biz dünya tərəfindən tanınan qənaətbəxş iqtisadi inkişaf səviyyəsinə nail olmuşuq. Çox qısa vaxt ərzində biz ölkəmizdə əhalinin həyat səviyyəsini yaxşılaşdırmış, ölkəmizdə yaşayış səviyyəsini dünya standartları səviyyəsinə yüksəltmişik. Burkina-Faso prezidenti ilə görüşdə bu mövzular ətrafında fikir mübadiləsi apardıq. Mən ona dedim ki, bütün bunlar yaxşı idarəçilik və əzmkarlıq sayəsində mümkün olub. Xarici investorların ölkəyə cəlb edilməsi və onların yatırdığı kapital milli iqtisadiyyatın müxtəlif sektorlarının inkişaf etdirilməsinə imkan verib. Bu gün enerjisiz heç bir iqtisadi və sosial inkişaf mümkün deyil. Məhz buna görə də biz öz xidmətlərimizi təklif edirik. Çünki bu sahədə böyük təcrübəmiz var. Biz gələcəkdə Burkina-Faso və Azərbaycan şirkətlərinin investisiyaları sayəsində bu sahədə irəliləyişə nail olacağıq”, – deyə energetika naziri bildirib.
Azərbaycanlı nazir qeyd edib ki, bu əməkdaşlıq əsasən dövlət şirkətlərinə aiddir. O əmindir ki, Burkina-Faso prezidentinə təklif etdiyi çoxsaylı layihələr Burkina-Fasonun müxtəlif regionlarının inkişafına şərait yaradacaq və yeni resursların, xüsusilə neft məhsullarının ölkəyə axınına imkan verəcək.
Nazir Natiq Əliyevin açıqlamasını Meydan TV-yə şərh edən iqtisadçı Natiq Cəfərli bildirib ki, Azərbaycanın Burkina-Fasoda ciddi iqtisadi marağı ola bilməz. Bu ölkənin iqtisadiyyatı Avropanın 37 min əhalisi olan, ən balaca knyazlığı Andorranın iqtisadiyyatlndan 10 dəfə kiçikdir. Ümumiyyətlə, Burkina-Faso kiçik və xüsusi iqtisadi potensialı olmayan, maraq kəsb etməyən ölkədir. Sadəcə, hökumət çoxşaxəli siyasət yürütdüyünü göstərmək istəyir.
İqtisadçı hesab edir ki, Burkina-Faso qeyri-sabit bölgədə yerləşdiyindən Azərbaycanın ora investisiya qoymağının heç bir mənası yoxdur. Əgər bu ölkə investisiyalar üçün cəlbedici olsaydı, Çindən, Avropadan investisiya qoyulardı. Deməli, Burkina-Faso investisiya baxımından da cəlbedici deyil.
