Saytda hələlik müəllif yazıları olacaq
İki il öncə nəşrini dayandıran “Ayna” qəzeti yenidən fəaliyyətə başlayıb. Bu dəfə online formatda.
Baş redaktor Elçin Şıxlının Meydan TV-yə verdiyi məlumata görə, hazırki formatın əvvəlkindən fərqi var: “Bu gün maliyyə və başqa səbəblərdən çap versiyasını bərpa etmək mümkün deyil. Hələ ki, sayt kimi işlətməyə gücümüz çatır. Hazırda heyət İbrahim Nəbioğlu, Arif Əliyev, Qulu Məhərrımli, Rauf Mirqədirov və məndən ibarətdir. Əsas özək bu insanlardır. Sonradan kimlər yazmaq istəsə, baxacağıq. Sayt hər gün yenilənməsə də, bir-iki yazı olacaq. Sadəcə, yay fəsli olduğunu nəzərə alıb adi xəbər saytlarında olduğu kimi 3-5 dəqiqədən bir yenilənmə etməyəcəyik, sürət götürmək üçün zaman lazımdır”.
Elçin Şıxlı deyir ki, yeni formatın bir fərqi də odur ki, ofisə ehtiyac olmayacaq: “İnternet var, hər şeyi bunun vasitəsilə edəcəyik”.
1990-cı ilin avqustunda yaradılan “Ayna” və “Zerkalo” qəzetləri 2014-cü ilin may ayının əvvəlində dövriliyini azaltmış, rus dilində gündəlik nəşr olunan “Zerkalo” həftədə bir dəfəyə keçmişdi. Azərbaycan dilində çıxan “Ayna” həftəliyinin isə ayda bir dəfə işıq üzü görməsi qərara alınmışdı. Ancaq nəşrləri bu yolla da saxlamaq mümkün olmamış, iyunun 1-dən hər iki qəzetin nəşri dayanmışdı.
