AXCP-nin gənc fəalına 7 il həbs tələb olundu

AXCP Gənclər Komitəsinin həbsdə olan üzvü Orxan Baxışlı

AXCP Gənclər Komitəsinin həbsdə olan üzvü Orxan Baxışlı

Orxan Baxışlı ilə bağlı məhkəmə istintaqı yekunlaşıb

Azərbaycan Xalq Cəbhəsi Partiyasının həbsdə olan fəalı Orxan Baxışlının işi üzrə məhkəmə istintaqı başa çatıb.

Sentyabrın 13-də Bakı Ağır Cinayətlər Məhkəməsində keçirilən prosesdə O.Baxışlının vəkil Elçin Sadıqov bəzi sənədlərin sübutlar siyahısından çıxarılması haqda vəsatət qaldırıb.

Vəkilin sözlərinə görə, cinayət işindəki protokollar qanunsuz yolla əldə edilib və sübut kimi onlara istinad oluna bilməz: "Adamı tutublar, ərazi aidiyyətini müəyyən eləməyiblər. Əvvəl 26-cı bölməyə aparıblar, sonra 28-ci bölməyə".

Vəsatət baxılmamış saxlanılıb.

Daha sonra dövlət ittihamçısı çıxış edib. Prokuror deyib ki, O.Baxışlının üzərindən narkotik tapılmasına dair ittiham təsdiqini tapıb. O, cəbhəçi gəncin 7 il azadlıqdan məhrum edilməsini istəyib.

Sentyabrın 18-də növbəti məhkəmə iclasında vəkil çıxış edəcək.

AXCP Gənclər Komitəsinin Xətai şöbəsinin üzvü O.Baxışlı mayın 7-də həbs olunub. O, Cinayət Məcəlləsinin 234.4.3 maddəsilə ittiham olunur. İddia edilir ki, gənc fəalın cibindən 6 qram heroin tapılıb. Bu maddədə 5 ildən 12 ilə qədər həbs nəzərdə tutulub.

O.Baxışlı ittihamı rədd edir, narkotikin ona məxsus olmadığını, saxlandıqdan sonra cibinə polislər tərəfindən atıldığını bildirir.

Yaxınları və üzvü olduğu AXCP O.Baxışlının həbsini xüsusən həbsindən dörd gün öncə - mayın 3-də Beynəlxalq Söz Azadlığını Müdafiə Günü ilə əlaqədar mərhum jurnalist Elmar Hüseynovun məzarı önündə etdiyi çıxışla əlaqələndirir. Orada O.Baxışlı E.Hüseynovun bu hakimiyyət tərəfindən qətlə yetirdiyini, o üzdən qatillərin tapılıb cəzalandırılmadığını bildirmişdi.

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/4l7itl

Ən çox baxılan