Əsabəli Mustafayev: ”Bu fakt artıq sistem noqsanının və inzibati praktikanın göstəricisidir”
İyunun 30-da Avropa İnsan Haqları Məhkəməsi Azərbaycanla bağlı yeni qərarlarını açıqlayıb. Bu barədə vəkil Əsabəli Mustafayev öz Facebook səhifəsində məlumat yayıb. Onun sözlərinə görə, Avropa Məhkəməsi 18 iş üzrə qərarlarını elan edib. Onun 13-ü Əsabəli Mustafayevin apardığı işlərdir. O, Məmməd İbrahim, Əbülfəz Qurbanlı, Rüfət Hacıbəyli, Elşad Budaqov, Orxan Carçıyev, Vaqif Xalıqov, Hafiz Fərhadi, Elçin Cərullayev, İnqilab Kərimov, Şakir Abbasov, Zülfüqar Eyvazov, Təzəxan Mirələmli, Bəhruz Həsənovun vəkili olub:
“Bu qərarlarla mitinqdə iştiraka görə ərizəçilərin tutulması və inzibati həbs cəzasına cəlb olunmaları Konvensiyanın 5 (azadlıq və şəxsi toxunulmazlıq hüququ), 6(ədalətli araşdırma hüququ), 7 (qanunsuz cəzalandırmamaq) və 11-ci (sərbəst toplaşma azadlıqı) maddələrin pozuntusu tanınıb. Kompensasiya hamiya eynidir, mənim apardığım iş üzrə ümumi məbləq 165 000 avro təşkil edir. Digər işlərlə birlikdə isə şikayətçilərə ümumilikdə 230 000 avro ödəniləcəkdir. Təqribən 400 000 manat. Ümumilikdə bu ay apardığım 15 iş üzrə Avropa Məhkəməsi qərar qəbul edib. İlin əvvəlindən isə oxşar işlərin sayı 20-yə çatdı. Bu fakt artıq sistem noqsanının və inzibati praktikanın göstəricisidir. Hakimiyyət nümayəndələrinin “bizdə məhkəmələr müstəqildir, bizdə bütün hüquqlar təmin olunub” ifadəsini işlətməmişdən qabaq bu qərarların oxumaqları məsləhətdir”.
Avropa Məhkəməsinin daha 4 qərarı seçki ilə bağlı olub: Nurəddin Məmmədli, Dünyaxanım Cərullayeva, İltizam Əkbərli, Nobatali Palanqovun işi.
Hər şikayətçiyə 10 min avro və ümumilikdə hüquqi yardım üçün 4 min avro təzminat ayrılıb. Cəmi 44 000 kompensasiya təyin olnub. Nobatali Palanqovdan başqa digər üç nəfərin işində nümayəndə İntiqam Əliyevdir.
Ə.Mustafayevin sözlərinə görə, iyunun 30-da Avropa Məhkəməsi mülkiyyət hüququnun pozuntusu ilə bağlı Rüstəm Dəmirovun işi üzrə də qərar elan edib, kompensasiyanın məbləqi 20 900 avrodur.
