“Nominal məbləğ kimi götürəndə sığorta tariflərində kəskin artımın olması gözlənilmir”
Azərbaycan Sığortaçılar Assosiasiyasının (ASA) sədri Orxan Bayramovun “APA-Economics”ə verdiyi məlumata görə, yeni standartların tətbiqi və xaricdən daha köhnə avtomobillərin gətirilməsinin məhdudlaşdırılması nəticəsində ölkənin avtomobil parkında nisbətən yeni avtomobillərin payı artacaq: “Yeni avtomobillər isə köhnələrə nisbətən baha olduğuna görə onların kasko sığortası üzrə tariflər də bir qədər yüksək olmalıdır”.
Orxan Bayramov hesab edir ki, adətən sığorta tarifləri köhnə avtomobillərdə daha yüksək olur. Söhbət faiz göstəricisindən gedir: “Bu, yeni avtomobillərin texniki cəhətdən daha saz vəziyyətdə olması, ona görə də qəza və ya sığorta hadisəsi riskinin aşağı olması ilə əlaqədardır. Buna görə də, nominal məbləğ kimi götürəndə sığorta tariflərində kəskin artımın olması gözlənilmir”.
ASA sədrinin sözlərinə görə, “Avro-4” standartlarının tətbiqinin sığorta sahəsinə digər təsiri də olacaq. Yeni avtomobillər daha saz vəziyyətdə olduqlarından, onların park-radar və əyləc sistemi daha təkmil olduğundan, qəza hallarının yaranması ehtimalı da az olur.
“Nəhayət, bir məsələni də nəzərə almaq lazımdır ki, ölkəyə köhnə avtomobillərin gətirilməsinin məhdudlaşdırılması ilə eyni vaxtda avtomobil kreditləşməsində də yeni tələblər qoyulub. Nəticədə avtomobillərin kreditlə alınması məhdudlaşdırılıb – bu da avtomobillərin kəskin bahalaşmasına imkan verməyəcək” deyə Orxan Bayramov fikrini tamamlayıb.
