”Nazirlik məni qəbul etdi, heç bir tələb qalmadı”
10 gündür Nizami metrosunun qarşısındakı parkda aclıq aksiyası edən gənc Aqşin Beynəlmiləl öz istəyinə çatıb. Əmək və Əhalinin Sosial Müdafiəsi Nazirliyindən ona işsizlik müavinətini verəcəklərini deyiblər.
Bu barədə Meydan TV-yə Aqşin Beynəlmiləl özü məlumat verib.
Bildirib ki, şikayəti ilə əlaqədar Əmək və Əhalinin Sosial Müdafiəsi Nazirliyi onu qəbul edib: “Müvafiq dövlət qurumununun rəhbərliyi tərəfindən qəbul olundum. Mənə izahat verildi. Heç bir tələb qalmadı”.
Bununla da Aqşin bu gün günorta aclıq aksiyasını bitirib:
“Bu müddətdə dəstək olan hərkəsə ürəkdən təşəkkür edirəm”.
Aqşin Beynəlmiləl Binəqədi Rayon Məşğulluq Mərkəzindən işsizlik müavinəti ala bilmədiyini deyirdi. Aqşin problem ilə bağlı Əmək və Əhalinin Sosial Müdafiəsi Nazirliyinə də müraciət edib. Bir müddət əvvəl nazirlikdən ona məktubunun itdiyini deyiblər. Buna etiraz olaraq Aqşin 10 günə yaxın Əmək və Əhalinin Sosial Müdafiəsi Nazirliyinin yaxınlığındakı parkda aclıq aksiyası keçirib.
