Nuşirəvan Məhərrəmli: ”ANS telekanalının səmimi etirafları nəzərə alınaraq bu addım atılıb”
“”Hesabat” verilişi ilə bağlı qəbul edilən qərarın icrasını müvəqqəti dayandırırıq”.
APA-nın xəbərinə görə, bunu Azərbaycan Milli Televiziya və Radio Şurasının (MTRŞ) sədri ANS televiziyası tərəfindən yol verilmiş qanun pozuntuları ilə bağlı keçirdiyi mətbuat konfransında deyib. O bildirib ki, ANS telekanalının səmimi etirafları nəzərə alınaraq bu addım atılıb.
MTRŞ yanvarın 22-də ANS-in “Hesabat” proqramının yayımının 1 ay müddətində dayandırılması barədə qərar qəbul edib.
Məhərrəmli ANS televiziyasının serial çəkilişi ilə bağlı dediklərini qətiyyətlə rədd etdiyini deyib: “Heç bir telekanala qərəzimiz yoxdur. Azərbaycan prezidentinin sərəncamı ilə serialların çəkilişinə əvvəl 5 milyon, sonra isə 6 milyon manat vəsait ayrılıb. Bu vəsait qəpiyinə qədər telekanallar arasında bölüşdürülüb”.
O, bildirib ki, serial çəkilişi ilə əlaqədar ANS telekanalına 1 milyon 760 min manat vəsait ayrılıb: “Serial çəkilişi üçün “Lider”ə 1 milyon 800 min manat, “Space”ə 1 milyon manat 800 min manat ayrılıb. 2015-ci ildə isə “Region” telekanalına 550 min manat vəsait ayrılıb. Telekanal gec yarandığı üçün az vəsait verilib”.
Şura sədri əlavə edib ki, MTRŞ serial çəkilişi ilə əlaqədar müqavilə öhdəliklərini yerinə yetirmədiklərinə görə ANS və İctimai Televiziyanı məhkəməyə verib: “Abşeron” serialının çəkilişi ilə bağlı ANS-ə 200 min manat vəsait verilməli idi. Birinci mərhələdə 60 min, ikinci mərhələdə 100 min, üçüncü mərhələdə isə 40 min manat ödənilməliydi. ANS telekanalı bu işə məsuliyyətsiz yanaşdı. “Abşeron” serialının adının dəyişdirilməsi üçün bizə müraciət etdilər. Biz də onları məhkəməyə verdik. Bu dediklərim onların 40 min manatla bağlı iradlarına cavabdır”.
N. Məhərrəmli qeyd edib ki, bu gün ən çox qanunları pozan ANS telekanalıdır: “Bizim verdiyimiz qərarlar qanunlara əsaslanır və biz qərarların doğruluğuna əminik”.
