“Mən İntiqam Əliyevə təzyiqlərdən və onun səhhətinin pisləşməsindən narahatam”
AŞPA prezidenti Ann Brasser növbəti dəfə Azərbaycan hakimiyyətini həbsdə olan hüquq müdafiəçisi İntiqam Əliyevi səhhətinin pisləşməsilə əlaqədar azad etməyə çağırıb.
O, Tvitterdəki mikrobloqunda yazıb: “Mən İntiqam Əliyevə təzyiqlərdən və onun səhhətinin pisləşməsindən narahatam. Bunu nəzərə alaraq, onu azad etməyə və ittihamları üzərindən götürməyə çağırıram”.
Bu, siyasi məhbusların azadlığa buraxılması ilə bağlı A.Brasserin Azərbaycan hakimiyyətinə ilk müraciəti deyil.
İ.Əliyev 2014-cü ilin avqustunda 7 il müddətinə azadlıqdan məhrum edilib. O, vergidən yayınma, sui-istifadə və qanunsuz sahibkarlıqda ittiham olunur.
“Amnesty International” İ.Əliyevi vicdan məhbusu kimi tanıyıb (Turan İA).
