Ali Məhkəmə hüquq müdafiəçisinin kassasiya şikayətini rədd etdi

Oqtay Gülalıyev: “Azərbaycan məhkəmələrində verilən vəsatətlər daşa- divarlara oxunur”

İyunun 25-də Ali Məhkəmənin Cinayət Kollegiyasında hüquq müdafiəçisi Oqtay Gülalıyevin oğlu Əlgüşad Gülalıyevin şikayətinə baxılıb. Meydan TV-yə bu barədə məlumat verən hüquq müdafiəçisi deyib ki, məhkəmə prosesində Bakı Apellyasiya Məhkəməsinin ilkin baxış iclasından verdikləri kassasiya şikayətinə baxılıb və rədd edilib: “Şikayətimiz onunla bağlı idi ki, həm ibtidai istintaqda, həm Xətai rayon Məhkəməsində, həm də Apellyasiya Məhkəməsində kifayət qədər qanun pozuntuları olmuşdu. İbtidai istintaqda şahidlər- yetkinlik yaşına çatmayan məktəbli uşaqlar valideynlərinin izni və xəbəri olmadan gecə saatlarında polis bölməsinə aparılıb təzyiq və işgəncə altından onlardan oğluma qarşı izahat alınıb. Əvvəlcədən hazırlanmış izahata qol çəkdiriblər. Xətai rayon Məhkəməsi nəinki şahidlərin bu ifadələrinə hüquqi qiymət vermiş, əksinə onların məhkəmədə verdikləri səmimi ifadələrini deyil, istintaq zamanı onlardan zorla, təhdid altında alınan ifadələri məhkəmə protokollarına köçürərək protokolları saxtalaşdırıblar. Birinci instansiya məhkəməsi həmçinin “zərərçəkən”- nin məhkəməyə gəlməkdən boyun qaçırmasını, zorla məhkəməyə gətirilməsini, şikayətindən imtina etməsini, məhkəmədə ifadə verərkən “mən şikayətçi deyiləm, polislər bizə evə gəlib şikayət ərizəsi yazdırdı”, “mən idmanın qaydasız döyüş növü ilə məşğulam, Rusiyada çempion olmuşam” etiraflarını eşitməməzlikdən gələrək müdafiə tərəfinin “necə oldu ki, sizdən yaşca və cüssəcə kiçik olan Əli sizin kimi qaydasız döyüş üzrə Rusiya çempionu olan bir idmançını döyə bildi?” sualına nəinki diqqət yetirməyib, həmin ifadəni məhkəmə protokollarına əlavə etməyi belə “unudub”.

Təəssüflə qeyd etmək lazımdır ki, bütün yuxarıda qeyd olunan pozuntuları eyni şəkildə Apellyasiya Məhkəməsi də nəninki təkrarladı, hətta bir az da qabağa gedərək, “zərərçəkən”- nin, onun müdafiəçilərinin, şahidlərin məhkəmədə dindirilməsi, videogörüntüyə baxış keçirilməsi və digər subutların araşdırılması barədə bütün vəsatətlərimizi rədd etdi. Biz de Apellyasiya Məhkəməsinin bu qərarından Ali Məhkəməyə kassasiya şikayəti verdik”.

Hüquq mudafiəşisi prosesin gedişindən narazı qalmayıb: “Ali Məhkəmədə proses pis başlamadı. Hakim Əli Seyfəliyev sözümüzü kəsmədən çıxış etməyə, fikirlərimizi bildirməyə və əsaslandırmağa şərait yaratdı. Bütün yuxarıda deyilənləri qısaca şəkildə Ali Məhkəməyə ərz etdik. Hətta dövlət ittihamçısı vəsatətimizin qəbul olunmasına etiraz etmədi. Ani olaraq ümid yarandı ki, heç olmasa Azərbaycan məhkəmələrində nadir hadisə olsa da, Ali Məhkəmə aşağı instansiyaların bilərəkdən və bilməyərəkdən buraxdığı səhvləri, qəbul etdikləri qanunsuz və saxta, siyasi qərarlarıın bir hissəsini ləğv edərək cinayət işinə obyektiv və ədalətli baxılmasına şərait yaradacaq. Amma çox təəssüf ki, Ali Məhkəmənin Cinayət Kollegiyası heç bir əsas gətirmədən, dəlil və sübutlara əsaslanmadan qanunsuz şəkildə kasasiya şikayətini rədd etdi. Necə deyərlər, oğlumla bağlı cinayət işində indiyə qədər yol verilmiş qanunsuzluğa və saxtakarlığa haqq qazandırdı. Artıq Apellyasiya Məhkəməsinin verəcəyi qərar indidən məlumdur.

Qanunsuzluğu gözlərimizin içinə baxaraq söyləyən Ali Məhkəmənin hakimi bizə “çıxış yolu” da göstərdi; “Vəsatətlərinizi Apellyasiya Məhkəməsində verərsiniz”. Bizimsə cavabımız o oldu ki, “Azərbaycan məhkəmələrində verilən vəsatətlər daşa- divarlara oxunur”.

Doğrudan da, bu gün Azərbaycan məhkəmələrində deyilən haqq sözlər, verilən əsaslı vəsatətlər sanki daşa- divarlara oxunur, hakimlər onları eşitmir və ya eşidib qəbul etmək zorunda deyillər. Amma hər işin əvvəli və sonu olduğu kimi Azərbaycan məhkəmələrində hökm sürən bu rəzalətin, siyasi karlığın və korluğun da axırı olacaq. Bunu hər kəs bilsin. Xüsusən hakim mundiri geyib yüzlərlə, minlərlə günahsız insanlarımızın taleyi ilə bağlı hökm verənlər və onların sifarişçiləri. Unutmasınlar ki, zamanın və xalqımızın onların haqqında verəcək hökmün tarixi uzaqda deyil. Bu gün ədalətsiz və qanunsuz hökm verənlər, özləri və öz taleləri haqqında hökm verirlər”.