Svetlana Əhmədova

Mənbə: Foto: Meydan TV

Başlıq: Svetlana Əhmədova

“Ağ şəhər” layihəsi bizi ikinci dəfə didərgin saldı”

Məqalə yeniləndi:  25 Fevral 2020

Svetlana Əhmədova aldadıldığını deyir

““Ağ şəhər” layihəsinin icrası ortaya düşəndə əmlaklarımızı gözümüzün önündə texnikanın qarşısına verib, sökdülər. Nə ah-naləmizə, nə göz yaşımıza baxdılar. Bir dəfə Ermənistandan didərgin düşmüşdük, “Ağ şəhər” layihəsi bizi ikinci dəfə öz vətənimizdə didərgin elədi”.

Bunu Meydan TV-yə “Ağ şəhər” layihəsi həyata keçirilən ərazidə - Babək prospekti, 2210-cu məhəllə, Turşu küçəsi, ev 32A ünvanında yaşamış Svetlana Əhmədova deyir. Onun sözlərinə görə, Ermənistandan didərgin düşəndən sonra atası hazırda “Ağ şəhər” layihəsinə düşmüş ərazidə ikimərtəbəli bina alıb. Əmlakı övladlarının arasında paylı mülkiyyət qaydasında bölüb. İkinci mərtəbə ayrı-ayrılıqda yaşayış sahələri kimi Svetlana xanımın qardaşlarının, birinci mərtəbə isə qeyri-yaşayış sahəsi kimi onun adına rəsmiləşdirilib. Svetlana Əhmədovanın deməsinə görə, mənzillər qardaşlarının əlindən təzyiq yoluyla, qeyri-yaşayış sahəsi isə onun əlindən aldadılaraq alınıb.

Polis şöbəsinə aparılıb, həbslə hədələnib

“2013-cü ilin sonlarında Xətai Rayon İcra Hakimiyyətindən gəlib ölçü işləri apardılar, dedilər, 1 ay ərzində mülkü boşaltmalısız, torpaqlar dövlət ehtiyacları üçün alınır. İkinci mərtəbədə ayrı-ayrı evlərdə qardaşlarım yaşayırdı, birinci mərtəbədə isə mən gözəllik salonu açmışdım. Mənə 73 kvadratmetr sahəsi olan qeyri-yaşayış sahəsinə görə 64.850 manat təklif olunurdu. Qardaşlarıma da mənzillərinə görə dəyərindən az məbləğ təklif edilirdi. Biz razılaşmırdıq. 2014-cü il, avqustun 11-də səhər saatlarında texnikalarla gələrək ikimərtəbəli binanı içərisindəki əşyalarıyla birlikdə dağıtdılar. Qardaşlarımın qollarını qandallayıb apardılar, söküntü bitənədək polis şöbəsində saxladılar”, - Svetlana Əhmədova deyir.

"Ağ şəhər"

"Ağ şəhər"

Mənbə: Meydan TV

Şikayətçinin sözlərinə görə, hər iki qardaşı verilən kompensasiyayla komissiya rəhbərliyinin təzyiqləri, hədələri altında “razılaşmalı olub”. O isə kompensasiyanın məbləği artırılmasa, götürməyəcəyini deyib. Svetlana xanım hətta polis şöbəsində də saxlanılıb, deməsinə görə, 37-ci polis şöbəsinin rəisi də ondan bank hesabına köçürülmüş kompensasiyanı götürməsini tələb edib: “Dedi, ya pulu götür, ya da sənə bir neçə maddəylə cinayət işi açacam, uşaqların da evdə ağlaya-ağlaya qalacaq. Səhərə kimi şöbədə saxlandım, dedim, əlinizdən gələn hansı pisliyi etsəniz də, pulu götürməyəcəm”.

“Hiyləyə əl atdılar”

Bütün bunlardan sonra komissiya rəhbərliyi başqa yola əl atıb:

“Bütün yolları sınadılar, gördülər, yola gəlmirəm, hiyləyə əl atdılar, məni aldatdılar ki, sənə 64.850 manatdan əlavə həm də obyekt veririk. Obyektin şəhər istiqamətindən gələndə Babək prospektinin başlanğıcında, Heydər Əliyev prospektinin yaxınlığında yerləşdiyini dedilər. Mən də sevindim, razılaşdım. Kompensasiyanı bank hesabından götürəcəyimlə bağlı bir akta imza atdırdılar. Sonra da birlikdə “obyekt” dedikləri yerə gəldik. Baxdım ki, “obyekt” dedikləri həmin bu yer Çin layihəli binalardan birinin 22 pilləkənlik dərinliyindəki boş, nəmişlik olan zirzəmidən ibarətdir. Düşündüm, imtina etsəm, bu da əlimdən çıxacaq, götürüm, sataram, pula çevirərəm. İcra başçısı mənə bir məktub verdi, dedi, apar ver Əmlak Komitəsinə, bu məktubun əsasında obyektə “Çıxarış” verəcəklər. 8-9 ay da Əmlak Komitəsinin qapısında düşüb qaldım, axırda Komitədə işləyən bir xanım dedi, səni aldadıblar, o yer ümumiyyətlə, özəlləşdirilə bilməz”.

Evi də sökülüb

Hər şey bununla bitməyib. Svetlana xanımın sökülmüş obyektinin yaxınlığındakı evi də 2017-ci ildə sökülüb. Sökülmüş əmlaka görə xanıma kompensasiya ödənilməyib.

Xətai Rayon İcra Hakimiyyətindən Meydan TV-yə bildirilib ki, Svetlana Əhmədova “Ağ şəhər” layihəsinin ərazisinə düşən qeyri-yaşayış sahəsinə görə kompensasiyanı alıb, ona kompensasiyadan əlavə qeyri-yaşayış sahəsi də verilib. Mənzilə görə kompensasiyanın məbləği ilə razılaşmayaraq əmlakın dəyərindən qat-qat çox pul istəyib.

Məhkəmənin qərardadı

Məhkəmənin qərardadı

Mənbə: Foto: Meydan TV

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Məqalə yeniləndi:  25 Fevral 2020
Bölmələr:  
qısa linklər:   http://mtv.re/y41e06

Ən çox baxılan