“Bir dəfə kamera yoldaşımız maşın çalaya möhkəm düşdüyünə görə, xəsarət almışdı”
“AbzasMedia”nın həbsdə olan əməkdaşları Ülvi Həsənli, Sevinc Vaqifqızı, Nərgiz Absalamova, Elnarə Qasımova məhbusların Bakı həbsxanasından məhkəmələrə hansı şəraitdə aparılması ilə bağlı birgə yazı hazırlayıblar.
Onlar bildirirlər ki, məhbuslar Qaz-53, Ford Tranzit və Fiat Doblo-larda daşınırlar.
“Dustaqların 95 faizi, bəlkə daha çoxu Qaz-53 və Ford Tranzitdə aparılır. Nadir hallarda isə “Doblo”larda daşınırlar. Nisbətən rahat olan bu maşınlarda, əsasən, qadın məhbuslar aparılıb gətirilir. “Çörək maşını” dedikləri Qaz-53-də havalandırma nəzarətçinin əli yorulana qədər olur. Yayın istisində dustaqlar nəfəs ala bilsin deyə nəzarətçi maşının tavanındakı qapağı açıb o vəziyyətdə dayanır. Qapağın dəstəyi yoxdur deyə, əl gücünə açıq saxlanılır. Məhbusların ümidi nəzarətçinin mərhəmətinə qalır ki, yorulub əlini qapaqdan tez çəkməsin, nəfəs ala bilsinlər”,- “abzasçılar” bildirir.
Yazdıqlarına görə, Ford Tranzit maşınında havalandırma, kondisioner sistemi adətən işləmir. İşlək vəziyyətdə isə kabinaları soyutmağa gücü çatmır.
“Dustaqların “xolodelnik” dedikləri yer Ford Tranzit maşınlarının təknəfərlik hissəsidir. Dustaqlar sərin olduqlarına görə bu yerə “xolodelnik” demirlər, əksinə soyuducu qapısı kimi bağlanandan sonra hava almağa yer qalmır. Yuxarıda xırda, çərçivəli, şüşəsi açılmayan çox kiçik pəncərə var. Eni, uzunu 1 metr olan bu dar yerdə oturanda tərpənməyə yer qalmır”.
“Fiat Doblo maşınında havalandırma nəzarətçilərin oturduqları salondan məhbus yerini ayıran şüşədəki 3 balaca deşiklə “təmin olunur”. Yayda bu şüşə çıxarılır və kondisionerin sərinliyi az da olsa məhbusa da çatır. Havalar isindikcə “Doblo”dan fərqli olaraq əksəriyyətin aparıldığı Ford Tranzit və Qaz-53 maşınlarında məhkəməyə daşınan dustaqlar köynəkləri su içində maşından düşürlər”, – yazıda qeyd olunur.
Əlavə olunur ki, problemlər bununla da bitmir. Maşınlar içi baxımsız, havasız, qaranlıq olur. Bəzi məhbuslar özləri ilə sellofan torba götürürlər ki, maşında havasızlıqdan ürəkləri bulansa, hazırlıqlı olsunlar:
“Normal ölçüdə pəncərə yoxdur ki, yola, kənar görüntüyə baxsınlar, maşının içi işıqlı olsun. Yarım saat, bir saat, bəzən 3-5 saat bu maşınlarla səfərlər edilir və qapalı, qaranlıq, havasız yerdə maşın məhbusları atıb-tutandan sonra ürəkbulanma başlayır. Problemlərdən biri də maşınlara tutumundan artıq insan yerləşdirilməsidir. Ford maşınlarından təkadamlıq yerə 2 nəfər, 5 nəfərlik yerə 7 nəfər, hətta 8-9 məhbus mindirilir. Oturmağa yer olmayanda dustaqlar ayaq üstə saxlanılır. Məsələn, siyasi məhbus Nicat İbrahim dəfələrlə ayaq üstə aparılıb gətirilib. Bu isə təhlükəsizlik qaydalarının pozulmasıdır”.
“Abzas Media” əməkdaşları deyir ki, əslində bu maşınlar insan daşımaq üçün nəzərdə tutulmayıb, yük maşını kimi düzəldilib. Amma Penitensiar Xidmətin rəhbərliyinin göstərişi ilə kustar üsullarla yük yeri dəyişdirilib, arakəsmələrlə 2-3 hissəyə bölünüb, taxta oturacaqlar qoyulub:
“Bir dəfə kamera yoldaşımız maşın çalaya möhkəm düşdüyünə görə, xəsarət almışdı və 10 gün stulda otura bilmədi. Fiat Doblo maşınlarının oturacaqlarında tutacaq yoxdur deyə, sürücülərin sərt döngələrində məhbuslar künc-bucağa yıxılıb xəsarət alırlar. Belə hallar mütəmadi baş verir. Çünki bu maşınlar insan daşımaq üçün nəzərdə tutulmayıb”.
Bildirirlər ki, Qaz-53 maşınlarının hər bölümündə 7 məhbus daşınmalı olduğu halda 14 nəfər aparılır:
“Maşına tutumundan iki dəfə çox dustaq yerləşdirilir. Məhbuslar 30-40 sm məsafə ilə üz-üzə otururlar. Məhbusların ayaqları qarşıda oturanların ayaqlarına çarx kimi keçməli və beləcə bir saat, rayonlara aparılanda saatlarla yol getməli olurlar. Məhbusları daşıyan maşınların təmizliyinə də fikir verilmir. İçi həşərat, hörümçək toru, konfet kağızları, salfetlər və digər zibillərlə dolu olur. Toza allergiyası olanlar üçün bu maşınlarda yola çıxmaq əsl işgəncədir”.
Qeyd olunur ki, bu maşınlar vaxtlı-vaxtında texniki baxımdan da keçirilmir:
“Bir neçə dəfə Penitensiar Xidmətin maşınları yolda xarab olub, dustaqlar növbəti maşını gözləməli olublar. Təkcə 2022-ci ildə dövlət büdcəsindən Penitensiar Xidmətə 140 milyon manat vəsait ayrılıb, amma illərdir məhbus daşıyan maşınlar köhnə, baxımsız haldadır. Bu şərtlərlə məhbus daşımaq insan ləyaqətini alçaltmaq, ən adi sosial məsafə qaydalarını pozmaq, gigiyenaya əməl etməmək və qeyri-insani rəftar deməkdir. Elə bu hallara görə, məhbusların döyəclədiyi maşınlardan qopan səsi hələ nə vaxta qədər Penitensiar Xidmətin rəisi Mirsaleh Seyidov eşitməzliyə vuracaq, bilinmir.
Avropa Penitensiar Qaydalarının 32.2-ci bəndində göstərilib ki, “Məhbusların havası kifayət qədər dəyişilməyən və işıqlandırılmayan, yaxud onlar üçün narahatlıq yaradan və ya onların şəxsiyyətini alçaldan nəqliyyat vasitələri ilə daşımaq qadağandır.
“Abzas Media” işi üzrə həbslər 2023-cü il noyabrın 20-dən başlayıb. Əvvəl nəşrin təsisçisi və direktoru Ülvi Həsənli və koordinatoru Məhəmməd Kekalov, daha sonra baş redaktoru Sevinc Vaqifqızı həbs edilib.
Daha sonra həbslər araşdırmaçı jurnalist Hafiz Babalı, Nərgiz Absalamova, Elnarə Qasımova, Fərid Mehralızadə ilə davam edib. Onlara qarşı Cinayət Məcəlləsinin 206.3.2-ci (bir qrup şəxs tərəfindən qaçaqmalçılıq) maddəsilə ittiham irəli sürülüb. İstintaqın sonunda ittiham ağırlaşdırılıb. Jurnalistlərə qanunsuz sahibkarlıq, cinayət yolu ilə əldə olunan vəsaitlərin leqallaşdırılması, vergidən yayınma və s. ilə bağlı əlavə ittihamlar verilib. Jurnalistlərə ittiham verilən maddələrin sanksiyasında 12 ilə qədər azadlıqdan məhrumetmə cəzası nəzərdə tutulub.
2023-cü il noyabrın 20-də Ülvi Həsənli saxlandıqdan sonra “Abzas Media”nın ofisində axtarış aparılıb. Saytın ofisindən 40 min avro pul tapıldığı iddia olunub.
Ülvi Həsənli isə orada pul olmadığını, 40 min avronun ofisə onu tapdığını iddia edənlərin özləri tərəfindən qoyulduğunu bildirib.
Adları çəkilən jurnalistlərin heç biri özünü təqsirli bilmir, “Abzas Media”da Prezidentin ailə üzvləri də daxil olmaqla, bir sıra vəzifəli şəxslərin biznesi, korrupsiya ilə bağlı araşdırmalara görə cəzalandırıldıqlarını bildiriblər.
Hökumət təmsilçiləri isə həbs olunanların konkret faktlar əsasında cəzalandırıldıqlarını bildirirlər.
