"8 ailənin yaşadığı tərəf tamamilə çökmüşdü, insanların hər an dağıntı altında qalmaq təhlükəsi vardı"

Mənbə: Foto: Meydan tv

Başlıq: "8 ailənin yaşadığı tərəf tamamilə çökmüşdü, insanların hər an dağıntı altında qalmaq təhlükəsi vardı"

8 ailənin hökumətdən mənzil tələbi

“Bizi qəzalı binadan çıxaranda tezliklə ev tikiləcəyini vəd etdilər, 4 ildir ki, kirayələrdə qalmışıq”

“Məskunlaşdığımız binadan çıxaranda dedilər, sizi başqa yaşayış yerləri ilə təmin edəcəyik. 4 ildir ortada qalmışıq. Vəziyyətimiz olduqca acınacaqlıdır”.

8 ailə uzun illər Göyçay şəhəri, Atatürk küçəsi, 102 saylı ünvandakı 58 saylı peşə liseyinin yataqxanasında məskunlaşıblar. 2015-ci ildə Fövqəladə hallar naziri Kəmaləddin Heydərov şəxsən binaya baxış keçirib, tikilinin bir hissəsinin çökməkdə olduğunu bildirərək ailələrin bir qisminin köçürülməsini tapşırıb. Həmin binada məskunlaşan və sonradan oradan çıxarılan ailələrdən birinin üzvü Etibar Bəşirov deyir ki, 4 ildir kirayələrdə yaşamağa davam edirlər.

“Nazir tapşırdı ki, ailələrə ev verilməklə köçürülsünlər”

“Binada 16 ailə yaşayırdı. 8 ailənin yaşadığı tərəf tamamilə çökmüşdü, insanların hər an dağıntı altında qalmaq təhlükəsi vardı. Nazir dedi ki, bu insanları bir gün də bu binada saxlamaq olmaz. 3 gündən sonra akt tərtib olundu, 8 ailə binadan çıxarıldı. Ailələri kirayə evlərə köçürdülər. 1 il 3 ay kirayə pulunu Göyçay Rayon İcra Hakimiyyəti ödədi. İcra hakimiyyətinin başçısı dəyişdi, yeni başçı kirayə pulumuzu kəsdi”, - Etibar Bəşirov deyir.

Sakinin sözlərinə görə, ailələrə ev tikilməsi ilə bağlı vədlərin üstündən 4 il keçir. Ailələr kirayə pulunu ödəyə bilmirlər:

“250 manat maaş alıram, 130 manat kirayəpulu ödəyirəm. İki övladım var, xəstə anam da mənim himayəmdədir. Qazancımın böyük hissəsi ev kirayəsinə gedir. Çox vaxt kirayə pulunun vaxtı çatanda borca girməli oluruq. Hökumət bizi evlə təmin etməlidir”.

Etibar Bəşirov

Etibar Bəşirov

Mənbə: Foto: Meydan tv

Ailələr yerli icra hakimiyyətinə müraciət etsə də...

Ailələrin deməsinə görə, 4 il əvvəl nazir həmin qəzalı binanın tezliklə söküləcəyini desə də, bina hələ də sökülməyib:

“Bizim yaşadığımız hissədə tavan artıq dağılmışdı, ancaq digər hissədə vəziyyət bir qədər fərqli idi. Ona görə də 8 ailə binadan çıxarıldı, digər 8 ailə hələ də orada yaşamağa davam edir. Bizi oradan çıxaranda tezliklə digər 8 ailənin də köçürüləcəyini də demişdilər. Ancaq 4 il keçir, nə ailələr köçürüldü, nə də bina söküldü. Bizi ortalıqda qoymaqdansa, elə yaşadığımız binanın dağılan hissələrini düzəltsəydilər, ən azı, indi kirayə pulu axtarmazdıq”.

Vəsait ayrılsa, məsələyə baxılacaq

Çətin durumda olan ailələr dəfələrlə rayon icra hakimiyyətinə, Birinci vitse-prezidentə, Fövqəladə Hallar Nazirliyinə və başqa qurumlara müraciət etsələr də, problem həll olunmayıb. Fövqəladə Hallar Nazirliyindən ailələrə göndərilən məktubda bildirilib ki, bina qəzalı tikililər siyahısına daxil edilib. Bu məsələ üçün vəsait ayrılacağı halda həllini tapacaq.

Göyçay Rayon İcra Hakimiyyətindən Meydan TV-yə bildirilib ki, 58 saylı peşə məktəbi sovet vaxtı fəaliyyət göstərib. SSRİ dağılandan sonra fəaliyyətini dayandırıb. Məktəbin yataqxanası isə yaşamağa evi olmayanlara sığınacaq kimi verilib. Bina qəzalı vəziyyətdə olduğu üçün həmin ailələr kirayə evlərə çıxarılıb. İcra hakimiyyəti 1 il 3 ay ərzində sakinlərə öz imkanları hesabına hər ay ailələrin hər birinə kömək üçün qeyri-rəsmi şəkildə 50 manat kirayəpulu ödəyib. Ancaq sonradan qurumun kömək etməyə maddi imkanı olmadığı üçün pul verilməsini dayandırıb. İcra hakimiyyətinin nəzdində mənzil fondu olmadığından keçmiş yataqxana binasından çıxarılan ailələri mənzillə təmin etmək imkanı yoxdur.

"Bizim yaşadığımız hissədə tavan artıq dağılmışdı, ancaq digər hissədə vəziyyət bir qədər fərqli idi".

"Bizim yaşadığımız hissədə tavan artıq dağılmışdı, ancaq digər hissədə vəziyyət bir qədər fərqli idi".

Mənbə: Foto: Meydan tv

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/ra3p1o

Ən çox baxılan